Drentsche Oetspraoken
Maandblad Drenthe december 1932
Drentsche Oetspraoken
Jan Oukies woonde op Scheloo (Schoonloo); Tiems Frerk woonde op 'n Brönger (Bronneger); Hinderk Jaokops woonde op de Klonie (Ellertshaar); van der Sluis woonde op Schoonoord; Gerriet Veldman woonde op Drouwendermeras (Drouwenerveen). En er zint mer plaosen, waar men op woont.
Aol Jan Aleng woonde in Börger; Fritsen Dolf woonde in Gasselt; Baoreld Homan woonde in Gieten, aol mester Pott woonde in Odoorn; Jan Hadders woonde in Vaalt (Valthe); Berrend Marissen woonde in Exel (Exloo), enz.
Waorum zee'n ze van op 'n plaos of in 'n plaos wonen? Ja, wel wett' now?
In Emmen zekgt ze van "waag" (wagen) b.v. "Oez volk zint met de waag hen Koeverder maark". In Borger gaat ze met de wagen hen Asser maark, in Gasselt en Gieten gaat ze met de waogen oet gaasten.
In Börger geeft de boeren heur koe'n water te drinken, in Gasselt en Gieten geeft ze heur waoter. In Börger draagt ze'n zak vol erappels, in Gasselt en Gieten draagt ze daormet.
In 't Zudenveld klaogt 'n boer over zien narm, as er aander wer kommen zal; in Börger hef zoo'n boer 't in d'aarm. Zoo is 't meesterwegens. In 't Zudenveld hebt de mensken twee narms, in 't Noordenveld twee aarms.
In 't zaantgebied hebt de boeren heur koe'n in d'stal of in d'weide, in 't veengebied hebt ze heur koun of koien in 't laand.
Zukke aoIde oetspraoken bint nog in stand, krek as de Friesche Memmetaol en de Gronger spraok.
As kinder maor wat geregeld hen schoeI gaot en 't Nederlaands wat beter anlert, dan holt dat aoIde van zols wat op, hier en in 't Zudenveld en overaal in oez' provincie. Over honderd jaor zal 't volk in Drenth mer Nederlaands spreken, dan in 't Grongerlaand, en die Friezen da's raor volk, daor he'j gien verstand van.
HARM TIESING